O vicepresidente segundo e conselleiro de Presidencia, Xustiza e Deportes, Diego Calvo, e a conselleira de Infraestruturas e Mobilidade, Ethel Vázquez, xunto co director xeral de Relacións Exteriores e coa UE, Jesús Gamallo, e a directora de Augas de Galicia, Teresa Gutiérrez, reuníronse esta mañá cunha delegación de Mozambique interesada en coñecer o sistema de xestión da auga da Xunta no marco do proxecto de cooperación AquaMoz, en cuxa comunicación colabora Agareso.
No marco do proxecto de cooperación entre administracións AquaMoz, a xefa do departamento de Recursos Hídricos e membro do consello de dirección da Administración Rexional da Auga do Sur de Mozambique (ARA Sul), Lizete Dias, e o enxeñeiro especialista en hidroloxía Ernesto Tivane, coñecerán estes días de primeira man as principais claves da xestión pública da auga en Galicia. A xuntanza de traballo entre a Xunta e a delegación de Mozambique coincidiu coa celebración, este luns, do Día Mundial do Medio Ambiente.
As accións do proxecto AquaMoz céntranse en 3 liñas de traballo: o monitoreo da seca nas principais concas do país africano, a mellora dos procedementos de xestión da seca e o desenvolvemento de accións de sensibilización, nun contexto de cambio climático global no que Mozambique é un dos países máis vulnerables. Estes traballos inclúen, ademais do acompañamento institucional e técnico ás administracións da auga, a realización de estudos técnicos, formacións na universidade local, publicacións científicas e campañas de sensibilización.
Esta iniciativa enmárcase na cooperación que a Xunta, a través de Augas de Galicia, vén realizando desde o ano 2012 co Goberno mozambiqueño, co obxectivo de fortalecer a xestión dos recursos hídricos que realizan as Administracións Rexionais das Augas de Mozambique. Augas de Galicia lidera este proxecto de cooperación, xunto con Cooperación Galega e ONGD Enxeñería Sen Fronteiras Galicia e o apoio do Grupo de Enxeñería da Auga e Medio Ambiente da Universidade da Coruña.
Os paralelismos existentes entre ambas as dúas entidades están a facilitar o intercambio de experiencias e de coñecementos a prol da mellora da xestión hídrica no país africano. Desde o ano 2012, esta colaboración está a permitir levar a cabo accións de cooperación coa administración da auga de Mozambique para facer fronte á seca que padeceu o sur do país desde o ano 2016, a máis severa en 25 anos. Neste sentido, nun traballo conxunto con Augas de Galicia, ata a data foron realizados estudos de caracterización da seca na dita conca e traballouse co deseño dun Boletín Mensual de seca.