Parte do equipo de Agareso está estes días na illa de Santiago, en Cabo Verde, realizando o traballo de campo do proxecto de investigación en cooperación para o desenvolvemento que levamos a cabo este ano xunto co Equipo de investigación Sociedades en Movemento (ESOMI) da Universidade da Coruña e co financiamento de Cooperación Galega. O traballo explora o impacto que tivo e ten o intercambio de coidados e de remesas monetarias no desenvolvemento e benestar das comunidades que participan do fluxo transnacional da migración entre Cabo Verde e Galicia. Nomeadamente, entre a illa de Santiago e a mariña luguesa.
O equipo do proxecto observa estes días nas conversas mantidas coas mulleres caboverdianas como a circulación transnacional de coidados e de remesas é un importante axente de desenvolvemento, sustentabilidade e benestar dos fogares transnacionais caboverdianos.
Agareso está a rexistrar o traballo de campo co obxectivo de elaborar materiais de sensibilización que visibilicen e poñan en valor o papel das mulleres migrantes na supervivencia e no benestar a ambos lados da corrente migratoria, a partir das historias de vida de mulleres de varias xeracións que sosteñen o capital familiar e se fan cargo dos coidados de crianzas e maiores, tanto en Burela como na illa de Santiago.