O Curso de Especialización en Comunicación para o Cambio Social “Comunicar para o Cambio” é unha proposta formativa cunha traxectoria de 15 anos de experiencia. Conta con 12 sesións teórico-prácticas impartidas por xornalistas e comunicadoras especializadas nos seguintes temas: o discurso do odio racista, por xénero e/ou orientación sexual, o tratamento das migracións e a divulgación e activismo ambiental. O curso remata cun módulo práctico ao que poden acceder algunhas das persoas que realicen un traballo durante o curso.
Esta proposta formativa responde á necesidade de construír unha formación no eido da comunicación para a transformación social que procure a xeración de novas narrativas contra o odio, a desinformación e pola defensa dos DDHH. Incluír estes enfoques nos currículos formativos non supón dar resposta a necesidades concretas dun grupo de persoas interesadas, senón que o seu coñecemento debe ser imprescindible á hora de traballar calquera tipo de información.
Aquí tes o programa da edición de 2026:
Preguntas frecuentes
Se non podo ir presencialmente, podo acceder ao curso?
Si, ten tamén versión online. Porén, as sesións prácticas (unha por módulo) non estarán dispoñibles para estas persoas. A maiores, o curso conta cunha aula virtual onde se compartirán os contidos das sesións e se aportán materiais complementarios.
Necesito coñecementos de comunicación?
Aínda que o fío condutor do curso é a comunicación, non é necesario ter formación específica no eido xa que se terán en conta os distintos perfís profesionais para conformar os grupos de traballo.
Facilitaráseche un certificado e, no caso do alumnado da Universidade de Vigo, os créditos correspondentes (por confirmar cantos).
Que prezo ten o curso?
A matrícula ten un custe de 150€ no caso da modalidade presencial e 120€ a online. Preinscribíndote antes do 31/12 podes acceder a un desconto do 20%.
Edicións anteriores
Confiamos na metodoloxía aprender-facendo, polo que durante a formación o alumnado leva a cabo pezas de comunicación con enfoque de dereitos tanto de xeito individual como grupal co acompañamento do persoal técnico especializado de AGARESO.
As súas persoas cos mellores traballos realizados durante a formación reciben unha beca para realizar un módulo práctico en terreo. Nesta viaxe o alumando desenvolve unha peza de comunicación con enfoque de dereitos humanos. Nos últimos anos viaxouse a : Gran Canaria, Lepe, Senegal e Marrocos.
A continuación, preséntanse as pezas resultado das viaxes de prácticas dos últimos anos:
2024
Curta documental que trata de debullar a realidade migratoria feminina a través de voces protagonistas e persoas que traballan directamente con elas na súa chegada á sociedade canaria. Por mor do xénero, as mulleres sofren un dobre drama migratorio. Están expostas a violacións, situacións de maltrato e incluso escravitude, e cando chegan á sociedade española enfróntanse tamén a prexuízos que agudizan a súa situación de vulnerabilidade.
2023
Reportaxe multimedia sobre o incesante avance do mar no norte de Senegal. Un percorrido de 20 anos a través das consecuencias da brecha artificial que se fixo na lingua de area que separa o río Senegal do océano Atlántico para evitar que a histórica cidade de Saint Louis se inundara. Intervención humana, subida do nivel do mar e cambio climático, todo se mestura agravando un fenómeno que condicionou toda a vida da rexión: a erosión costeira.
2022
En Oukout, catro mulleres reúnense cada domingo co seu grupo para autoxestionar un sistema de microcréditos xunto coa colleita de arroz, xa que o individualismo non ten cabida na súa sociedade. Xuntas procuran un equilibrio entre a vida tradicional e a independencia económica. Kalabukú —«as mulleres» en diola— sementan a semente dun cambio que se está xestando.
2021
Un documental que aborda a situación de miles de mulleres que chegan a España cada ano a traballar nos campos de cultivo de Huelva. Temporeiras de orixe marroquí contratadas baixo a Orde Gecco, a través do Goberno de España, que sofren constantes abusos laborais e sexuais.
2020
Mina, Ibra e Cheikh chegaron a España coa esperanza de mellorar as súas vidas. En lugar diso, acabaron en Lepe vivindo en chabolas e sufrindo durísimas condicións laborais. Os seus testemuños achégannos á realidade da migración e do racismo.
2019
A través da vivencia persoal da guineana Bari Fatimatah e o marfileño Kone Mohamed, “Tras la valla” pretende reflexar a difícil situación das persoas migrantes que chegan a Marrocos en busca de unha vida mellor. É tamén unha crítica ás políticas migratorias, que se endureceron nos últimos anos para intentar frenar a chegada de inmigrantes a Europa, sen ningún resultado. Son moi poucas as organizacións que traballan en terreo para garantir que estas persoas teñan garantidos os dereitos básicos.
2018
Unha historia de voces agochadas que teñen o poder de cambiar as cousas. Voces que buscan un lugar nun sistema que as infravalora, as agrede e as priva de dereitos. Voces que se empoderan para conquistar as rúas. Rúas que, sendo súas, están moi lonxe de escoitalas. As mulleres alzan as súas voces neste documental para darnos a coñecer unha realidade que semella afastada á nosa, mais que remata por ter cousas en común: unha sociedade non igualitaria.
2017
Os encarceramentos, a represión física e a censura mediática son só algunhas das consecuencias que sofren as activistas marroquís cando se enfrontan ao ‘majzen’, a estrutura de poder clásica do país. Non obstante, estas dificultades non supuxeron un impedimento para que, nos últimos tempos, os movementos activistas en Marrocos cobraran máis forza.
Novas
Opinións alumnado
Ámbito territorial: Galicia
Datas: anual dende 2010
En colaboración con: Facultade de Comunicación da Universidade de Vigo
Financiado por: Cooperación Galega e Consellería de Cultura, Lingua e Xuventude (Xunta de Galicia)
Orzamento: (por acabar de concretar)