Castañas no verán

Castañas no verán

Castañas no verán é un podcast radiofónico creado por voluntarias de Agareso. Foi ideado antes da pandemia pero xestado e posto a andar en plena crise do coronavirus.  Estreouse o 15 de abril do 2020 e ten carácter mensual.

A finalidade do podcast é a de entreter, acompañar, e sobre todo tratar temas que normalmente quedan máis escondidos nos medios de comunicación de masas.  Cremos que a comunicación social é necesaria para facer da sociedade na que vivimos un lugar máis xusto e igualitario. 

Ademais, pretendemos dar voz a persoas que normalmente non teñen ese altofalante. Deste xeito esperamos contribuír, na medida das nosas posibilidades, a un pensamento crítico e con conciencia colectiva.

O título escollido para dar vida ao podcast é toda unha declaración de intencións. As castañas son algo moi da terra, pero non soen darse no verán, polo que tamén ten o seu compoñente utópico. Queremos que este sea un podcast diferente, que fale de todos os recunchos e realidades do mundo, pero tendo claro de onde partimos.

Este é un espazo feminista, apolítico e respetuoso co medio no que vivimos.

Na actualidade a equipa que traballa, de xeito voluntario e altruista, na elaboración do programa está formada por nove persoas. Elas son: Rocío Cadahía, Óscar Vázquez, Lucía Rodríguez, Cinthya Martínez, Lara Dopazo, Uxía Pérez, María Aneiros, Sofía Caamaño e Verónica Couto.

Programas publicados

1×01 Benvidos ao noso souto

Como non podía ser doutro xeito, o primeiro programa de Castañas no verán falou da pandemia do Coronavirus. Percorremos diferentes puntos do mundo, poñendo especial foco nas persoas máis vulnerables. Crise económica, febre do papel hixiénico ou incluso memes, todo iso neste primeiro programa.

1×02 A outra cara da pandemia

Collendo o testigo do primeiro programa do podcast, que falaba do Coronavirus, no segundo quixemos incluír varias iniciativas populares que axudan ás persoas máis desfavorecidas.  Tamén analizamos a linguaxe empregada polos políticos actuais durante a pandemia e puxemos o foco nos coidados. Quen se encarga maioritariamente de esa parte tan importante?

1×03 A crise do capitalismo

Dende que o Coronavirus chegou ás nosas vidas falouse moito da crise do capitalismo. Por iso, dende Castañas no verán quixemos analizar en profundidade este tema. Está realmente o capitalismo en crise? O modelo de vida estadounidense, o medio ambiente, o movemento ecolóxico e outros temas entran dentro destes 60 minutos.

1×04 Trata

A trata de persoas con fins de explotación sexual é unha realidade. Dende Castañas no verán quixemos abordar este tema tan complicado para dar visibilidade a unha situación moi silenciada. Neste programa intentamos coñecer un pouco cal é a situación das mulleres vítimas de trata. Ademais, falamos da trata de persoas menores de idade e, por outra banda, do Caso Carioca.

1×05 A Paguita

Antes de entrar en vigor, o ingreso mínimo vital xa protagonizaba os principais titulares dos medios de comunicación. Por iso, neste programa analizamos polo miúdo quen pode acollerse a esa nova axuda. Quixemos deixar claro os umbrais da pobreza a nivel autonómico e nacional, e repasar as terribles cifras de pobreza infantil. 

1×06 Emigrantes e Inmigrantes

No último programa da primeira tempada de castañas no verán conseguimos xuntarnos nun estudio de gravación.  Foi emocionante vernos as caras para falar de migración, tanto dos que algún día marcharon como os que chegan aquí cada día.  Non puidemos pasar por alto tampouco os prexuízos e o discurso do odio contra as persoas migrantes.

2×01 Saúde Mental

A saúde mental leva sendo menospreciada moito tempo. Na maior parte dos casos as persoas que necesitan ser tratadas teñen que acudir a clínicas privadas, o que incrementa ainda máis as desigualdades existentes. Esta situación, xunto cos estigmas e a maneira de combatilos é outro dos temas que imos incluír neste Castañas no verán.

2×02 Violencia de xénero

Falar de violencia machista nunca é sinxelo. En Castañas no verán quixemos poñer o foco nos orfos por violencia de xénero. Falamos co fillo dunha muller asasinada polo que era o seu marido. El quixo visibilizar as necesidades que xorden en todo o proceso polo que tivo que pasar. Ademais, falamos de diferentes tipos de violencia, da necesidade dun bo plan de acompañamento e de victim blaming.

2×03 O Nadal

A Castañas no verán chegou tamén o nadal. Pero non falamos de turrón, aproveitamos as datas para falar de publicidade, de solidariedade so en determinadas épocas…e doutros moitos temas. Incluso creamos o noso propio conto de Nadal!

2×04 Maiores

No cuarto programa da segunda tempada de Castañas no verán quixemos reflexionar sobre a terceira idade. Analizamos o papel que lle damos na sociedade aos nosos maiores e preguntámonos se en algunhas ocasión tendemos a infantilizalos. Eles e elas son os protagonistas absolutos deste programa, quixemos darlle voz e escoitar que pensan. Ademais, falaremos de estigmas, de audiovisual, e de formas alternativas de vivenda e vida en etapa avanzada.

2×05 Precariedade laboral xuvenil

A precariedade laboral xuvenil é unha realidade que acompaña aos mozos e mozas na súa vida día tras día. Como chegamos ata esta situación, que provoca na actualidade e cara onde avanzamos serán algunhas das cousas que analizaremos neste programa.

2×06 A mercantilización dos corpos

Ventres de alugueiro, doazón de óvulos, Only Fans ou Sugardaddys. Este programa quixemos falar da mercantilización, ou non, do corpo das mulleres. Puxemos especial foco nas novas formas de mercantilización a través de internet e das redes sociais. Novas formas para prácticas vellas.

2×07 A auga

Adentrámonos no medio ambiente. En concreto, falamos de auga, un ben básico que escasea en tantos puntos do planeta. E aínda por encima, acaba de saír en bolsa. En que situación deixa isto á consideración da auga como dereito humano? 

Share This