O pasado mes de setembro comezamos a traballar na terceira fase do da Xeración Contrainfo, un proxecto de Educación para o Cambio Social impulsado por Agareso co financiamento da Xunta de Galicia para atallar a raíz do mecanismo que xera os discursos de odio, traballando a partir da empatía e mellorando a alfabetización mediática do alumnado, co obxectivo de evitar que callen os discursos emitidos polos grupos extremistas nas redes sociais e que poden levar a nosa adolescencia cara a posicións intolerantes e radicalizadas.
Nesta terceira edición queremos traballar contra a desigualdade entre homes e mulleres existentes entre a rapazada adolescente, para o que contamos coa axuda de docentes, alumnado e Anpas dos tres IES que participan no proxecto (IES do Milladoiro, IES de Soutomaior e IES Politécnico de Vigo) e das profesionais asociadas a Xornalistas Galegas. Ao longo destas primeiras semanas estivemos recollendo información sobre as vivencias destes colectivos e agora gustaríanos contar, tamén, coas do resto da sociedade galega.
Para facelo, elaboramos enquisas para alumnado de Secundaria, profesorado de Primaria e Secundaria e Familias con menores a cargo. Se pertences a algún destes grupos, agradecémosche que nos botes unha man, contestando sinceramente ás preguntas que vos facemos. Se es docente, agradecémosche especialmente que a fagas -nunha titoría, por exemplo- co teu grupo aula completo, porque ese microcosmos é o que mellor nos pode axudar a comprender as complexidades da nosa sociedade. Se formas parte do equipo directivo dun centro e consigues que o fagan varios grupos, quedaremos enormemente agradecidas. Se tedes dúbidas ou precisades axuda para facelo, escribídenos a organizacion@agareso.org.
