O xefe da Agrupación de Protección Civil de Meis, Jorge Fariña, quere matizar que non se trata, exactamente, dunha “ambulancia para mascotas”. Con este termo “pódese entender que agora imos nela a atender urxencias de animais”, pero si recoñece que este concello pasou de ter unha ambulancia para urxencias de persoas a un vehículo usado para o transporte de animais.

Cando a ambulancia actual cumpriu o seu oito anos de vida útil, a opción que quedaba era vendela e sacarían dela un prezo inferior a 1.000 euros. Este diñeiro non solucionaría ningún problema á agrupación, con todo, pensaron en que reciclándoa si darían un bo servizo á poboación.

Desde que se reciclou, esta nova ‘ambulancia’ xa realizou numerosos servizos. Os máis habituais están asociados coa recollida de mascotas, fundamentalmente, cans e gatos, que están abandonados na rúa e o seu traslado aos refuxios de animais para que reciban coidados nestas instalacións.

Para iso, Protección Civil adaptou a ambulancia antiga retirando a padiola e equipándoa cun transportín para cans ou gatos co fin de poder trasladalos sen que sufran ningún contratempo na viaxe.

O servizo desta particular ambulancia tamén serve de apoio para a Unidade Canina do Corpo de Bombeiros do Salnés, da que forma parte Jorge Fariña. “Cando hai algunha urxencia, usámolos como vehículo de transporte e como tamén levamos vendas e outro material para coidados sanitarios, se algún animal necesita unha primeira atención dámoslla”, explica.

A Agrupación de Protección Civil de Meis tamén colabora coa Asociación de Cans de Salvamento de Galicia (CASAGA).