Esta exposición veu percorrendo colexios e institutos durante os últimos tres anos cun notable éxito e ten, esencialmente, un carácter divulgador dos valores universais que a Declaración proclama. Acompáñase cun Minilibro cos Dereitos Humanos e co texto da Convención dos Dereitos de nenos e nenas.

Os actos conmemorativos do 63 Aniversario da Declaración Universal rematarán mañá, sábado día 10, ás 13:00 horas no centro comercial, cunha actuación musical do cantante galego Xoan Curiel, o reparto do citado Minilibro e a lectura pública dos 30 artigos da Declaración e o seu magnífico Preámbulo.

Así mesmo, na web do Seminario Galego de Educación para a Paz pódese acceder a moita máis información sobre estes actos, así como a un apartado específico onde o profesorado pode atopar numerosos recursos didácticos para abordar nas aulas esta celebración, nestas datas ou ao longo do curso académico.