AGARESO e Amigos da Terra, a través dun convenio de colaboración, comezaron no ano 2009 un proxecto de sensibilización para dar a coñecer en Galicia o traballo que a asociación ecoloxista leva a cabo no Golfo de Fonseca en temas de pesca artesanal sostible.
O primeiro paso foi o desprazamento a terreo de cinco reporteiros de AGARESO: a reporteira audiovisual, Laura López; o operador de cámara, Cristóbal Martín; o fotógrafo, Carlos Puga e as xornalistas, Estrella López e Eva Alonso, para visitar os proxectos que a asociación ecoloxista está a desenvolver en Nicaragua, O Salvador e Honduras, tres países que comparten esta zona, un ecosistema moi rico en diversidade biolóxica mariña - costeira.
Durante doce días os compoñentes de AGARESO tiveron a oportunidade de entrevistarse cas cooperativas de pescadores artesanais, con responsables de empresas galegas que contan con instalacións en O Salvador, institucións locais, cooperativas de mulleres e as contrapartes de Amigos da Terra, recollendo en formato dixital e a través de entrevistas os logros que se están acadando en diferentes aspectos, como a pesca artesanal sostible, a conservación dos recursos mariños ou a maior participación das mulleres no sector pesqueiro.
As 61 fotografías que engloban a mostra, o documental, así como o libro de fotografías e o blog elaborado durante a expedición, reflexan as vivencias e a situación medioambiental na que se atopa o Golfo de Fonseca.
