A Asociación Galega de Reporteiros Solidarios (Agareso) participará a vindeira semana no VI Encontro das Culturas organizado polo Concello de Lugo con senllos documentais. O luns 20 de maio, proxectarase ‘Camiños de paz. As outras voces de Israel e Palestina’, audiovisual realizado canda a ONGD Asemblea de Cooperación pola Paz (ACPP). O acto, tras o que se servirá unha degustación de comida árabe, dará comezo ás 19 horas no centro de convivencia Uxío Novoneyra.

Amosar o traballo da sociedade israelí e palestina que, en contra da corrente maioritaria, denuncia as inxustizas e traballa polo diálogo, o reencontro e a cooperación entre ambas partes, é o obxectivo tanto do audiovisual como da exposición que ata o 24 de maio permanecerá no centro. O documental ‘Camiños de paz. As outras voces de Israel e Palestina’ é obra dun equipo de Agareso que se desprazou ao lugar en 2010 e dun grupo de voluntariado da organización en España. As redactoras Mar Mato e Luisa Pérez, o cámara Hugo Fernández e o fotógrafo Pelu Vidal conformaron o equipo en terreo, mentres que a montaxe corresponde a Álvaro Ayala e Antonio Grunfeld e o guión a Luisa Pérez.

O martes 21, tamén ás 19 horas, presentarase no centro de convivencia de Fingoi ‘O Fondo Galego: Compromiso coa solidariedade’, audiovisual que visibiliza o traballo do Fondo Galego de Cooperación e Solidariedade, integrado por 91 administracións locais e provinciais entre as que se atopa o Concello de Lugo. A peza, elaborada por un equipo de voluntariado profesional de Agareso, amosa os proxectos impulsados en Nicaragua, Cuba e Cabo Verde, pero tamén as actividades de sensibilización en Galicia, amais de explicar a razón de ser da entidade.

O cámara Xacobe González e a xornalista Mónica González mesmo se desprazaron ao arquipélago africano para filmar as actuacións cofinanciadas polo Fondo Galego, mentres que algunhas imaxes enviáronas os parceiros desde terreo e outras rodáronse en Galicia. O obxectivo do documental é contribuír á concienciación sobre os desigualdades Norte-Sur e sobre a importancia da cooperación como ferramenta de cambio, amosando o papel das entidades locais galegas neste eido.

Agareso e o Fondo Galego de Cooperación achéganlle á cidadanía os resultados da solidariedade internacional promovida por esta asociación de Deputacións e Concellos a través dun documental.

A sesión dedicada ao tratamento mediático das persoas con discapacidade dentro do III Seminario 'Xornalismo social e cooperación internacional' rematou nos estudios de radio da Facultade de Xornalismo da USC. Usuarias e usuarios de Cogami participaron nunha edición especial do faladoiro 'Sen barreiras' canda o alumnado, ao que expuxeron as dificultades que atopan no seu día a día, pero tamén os apoios.

Download Embed Embed this video on your site

ACPP leva colaborando coa Mostra Internacional de Teatro Universitario desde o ano 2005. En todos estes anos promoveu a visita de compañías de: Palestina, El Salvador, Honduras, Nicaragua, Costa Rica e Guinea Bissau. Na edición deste ano, quixo presentar a realidade de Tunisia (país no que está presente desde 1994) achegando o traballo do grupo FANNI RAGHMAN ANNI - MON ART MALGRÉ MOI e falando con eles sobre a “primavera árabe”, preguntar como unha revolución que xerou tantas expectativas e foi exemplo de rebeldía inflúe na creación artística, e sobre todo, cales son as perspectivas de futuro da súa poboación.

Tras recompilar todos os documentos que solicitaba a Embaixada de España para conceder o visado aos artistas, algún máis que solicitaron posteriormente e moitos outros que lles pediron aos actores, pechouse o expediente para proceder á tramitación do visado. Tras demorar a resposta, a tan só tres días para a viaxe, a Embaixada comunicou que non concedía os visados porque non se cumpría cos requisitos, en particular cos requisitos económicos suficientes para descartar o risco de que os membros do grupo de teatro puideran quedar en España de maneira irregular. O Cónsul de España en Tunisia, Sr. Enrique Conde León, opúxose a autorizar a viaxe. ACPP non esperaba que o cónsul dun país con taxas de 26,30% de paro, 55,70% na franxa de menores de 25 anos (na que estarían os actores), probablemente considere que como a xente que quere viaxar non conta con recursos económicos suficientes hai risco de que se queden en España de maneira irregular. O representante dun goberno que fai bandeira das bondades da “marca España” non tivo a ben facilitar un simple intercambio cultural.

ACPP sinte que todo o traballo que leva feito para traer a Ourense a realidade tunesina, non poida materializarse, mais o que aconteceu reafírmaa na necesidade de seguir co seu traballo para rachar prexuízos e loitar por unha sociedade máis xusta e solidaria. ACPP quere facer fincapé na distancia que hai entre unha diplomacia ancorada noutros tempos e esta ongd, que explícita o seu compromiso por construir unha sociedade máis crítica e construtiva.

A MITEU, na súa XVIII edición, desenvolverase en Ourense do 12 ao 27 de abril. ACPP tamén colabora achegando a realidade de Ecuador, que participará representado polo artista Chokilla coa obra “La plegaria de la selva y otros cuentos” o día 22 de abril ás 20.30 no Auditorio Municipal.

A primeira parte do III Seminario 'Xornalismo social e cooperación internacional' pechouse coa intervención dalgunhas das organizacións máis representativas do terceiro sector en Galicia. Conclúe tamén así a introdución á cooperación para o desenvolvemento impartida por Paco Raigón, técnico de Asemblea de Cooperación pola Paz, que coorganiza o curso canda Agareso. Nesta peza realizada por alumnado de Xornalismo en prácticas escoitamos asemade a opinión e as expectativas de varias asistentes.

Download Embed Embed this video on your site

Durante ás próximas dúas semanas, Yelda, Paola e Juan, dúas mozas e un mozo de Nicaragua, visitarán institutos de toda Galicia para contar, dende a súa propia experiencia, como é a vida en Acahualinca, un barrio de Managua no que se atopa o vertedoiro Chureca do que ata hai ben pouco vivían milleiros de persoas.