Amosando elementos por tag Fondo Galego de Cooperación e Solidariedade

Agareso participa en Lugo no VI Encontro das Culturas con dous documentais

Agareso participa en Lugo no VI Encontro das Culturas con dous documentais

A Asociación Galega de Reporteiros Solidarios (Agareso) participará a vindeira semana no VI Encontro das Culturas organizado polo Concello de Lugo con senllos documentais. O luns 20 de maio, proxectarase ‘Camiños de paz. As outras voces de Israel e Palestina’, audiovisual realizado canda a ONGD Asemblea de Cooperación pola Paz (ACPP). O acto, tras o que se servirá unha degustación de comida árabe, dará comezo ás 19 horas no centro de convivencia Uxío Novoneyra.

Amosar o traballo da sociedade israelí e palestina que, en contra da corrente maioritaria, denuncia as inxustizas e traballa polo diálogo, o reencontro e a cooperación entre ambas partes, é o obxectivo tanto do audiovisual como da exposición que ata o 24 de maio permanecerá no centro. O documental ‘Camiños de paz. As outras voces de Israel e Palestina’ é obra dun equipo de Agareso que se desprazou ao lugar en 2010 e dun grupo de voluntariado da organización en España. As redactoras Mar Mato e Luisa Pérez, o cámara Hugo Fernández e o fotógrafo Pelu Vidal conformaron o equipo en terreo, mentres que a montaxe corresponde a Álvaro Ayala e Antonio Grunfeld e o guión a Luisa Pérez.

O martes 21, tamén ás 19 horas, presentarase no centro de convivencia de Fingoi ‘O Fondo Galego: Compromiso coa solidariedade’, audiovisual que visibiliza o traballo do Fondo Galego de Cooperación e Solidariedade, integrado por 91 administracións locais e provinciais entre as que se atopa o Concello de Lugo. A peza, elaborada por un equipo de voluntariado profesional de Agareso, amosa os proxectos impulsados en Nicaragua, Cuba e Cabo Verde, pero tamén as actividades de sensibilización en Galicia, amais de explicar a razón de ser da entidade.

O cámara Xacobe González e a xornalista Mónica González mesmo se desprazaron ao arquipélago africano para filmar as actuacións cofinanciadas polo Fondo Galego, mentres que algunhas imaxes enviáronas os parceiros desde terreo e outras rodáronse en Galicia. O obxectivo do documental é contribuír á concienciación sobre os desigualdades Norte-Sur e sobre a importancia da cooperación como ferramenta de cambio, amosando o papel das entidades locais galegas neste eido.


Sábado, 18 Maio 2013 Proxectos Ler máis...

Voces con Fondo 18 - Quince anos de compromiso local coa solidariedade internacional

Voces con Fondo pecha o ano cunha edición especial para conmemorar o 15º aniversario do Fondo Galego de Cooperación e Solidariedade. O espazo resume o evento central celebrado o 30 de novembro en Santiago de Compostela, que incluíu a presentación dun audiovisual realizado pola Asociación Galega de Reporteiros Solidarios.

Download Embed Embed this video on your site

O programa recolle o son dos relatorios das VII Xornadas de Cooperación, dos vídeos protagonizados polo voluntariado de Vacacións con Traballo e dos contos da Tropa de Trapo. O acto conducido pola actriz Mariana Carballal serviu para reafirmar que os Dereitos Humanos non son unha idea lixo.


Domingo, 23 Decembro 2012 AG Radio Ler máis...
Profesionais da escena no 15º aniversario do Fondo Galego

Profesionais da escena no 15º aniversario do Fondo Galego

O mundo da escena apoiará mañá o 15º aniversario do Fondo Galego de Cooperación e Solidariedade asistindo ao evento que se celebrará en Santiago de Compostela. Mela Casal, Ernesto Chao, Camila Bossa, Isi, Dorotea Bárcena, Josito Porto, Iolanda Muiños ou Rosa Alvárez confirmaron xa a súa presenza no acto conducido por Mariana Carballal, directora da serie 'Escoba!' da TVG. Actrices e actores súmanse ao persoal técnico e político das Deputacións e Concellos socios, destacados representantes locais e autonómicos dos partidos, ongd, sindicatos e asociacións que acudirán á conmemoración de tres lustros de compromiso municipalista cos Dereitos Humanos.

A celebración, con entrada libre e de balde, conta co apoio da Xunta de Galicia, a través de Cooperación Galega. A gala dará comezo ás 12.30 horas no edificio Cersia, situado en San Lázaro, onde desde as 9 da mañá terán lugar as VII Xornadas de Cooperación: 15 anos comprometéndonos coa solidariedade. Expertas e expertos de Galicia e internacionais compartirán mesa para analizar a cooperación municipalista no mundo e a situación do sistema galego de cooperación diante da crise.

Tras un café de comercio xusto, iniciarase o acto de conmemoración, no que se entregarán os premios do concurso fotográfico ‘Imaxes con Fondo’ e se presentará o documental sobre o Fondo Galego de Cooperación realizado por voluntariado de Agareso. A compañía A Tropa de Trapo compartirá con todos os presentes o seu espectáculo de contacontos e haberá tamén unha homenaxe sorpresa.

O evento de mañá pon fin á campaña ‘Somos unha rede de institucións e persoas’ impulsada nas últimas semanas para defender que os Dereitos Humanos non son unha idea lixo. A campaña incluíu diversos vídeos, protagonizados por participantes no programa de voluntariado internacional Vacacións con Traballo, que poden compartirse desde a páxina do Fondo Galego en Facebook e mais un ‘gag’ elaborado co apoio da CRTVG.

Tríptico das xornadas


Xoves, 29 Novembro 2012 Actualidade Ler máis...
Os viaxeiros do Terceiro mundo

Os viaxeiros do Terceiro mundo

O fotógrafo Jose Romay, membro de Agareso, vén de gañar o concurso de fotografía ‘Imaxes con Fondo’, promovido polo Fondo Galego de Cooperación e Solidariedade. A serie 'Os viaxeiros do Terceiro mundo' tirada nunha zona de invernadoiros onde traballan e viven inmigrantes en El Ejido (Almería) mereceulle a este profesional, veciño de Meis, unha viaxe a Cabo Verde para realizar un traballo fotográfico sobre algún dos proxectos apoiados pola entidade organizadora.

O xurado estaba integrado polos fotoxornalistas Gabriel Tizón, Carlos Puga e Sonia Daponte, a escritora Rexina Vega; a presidenta da Coordinadora Galega de ONGD, Gema Filgueira; a presidenta do Fondo Galego, Teresa París, e mais unha representante do Concello de Oleiros, Marga Figueroa. Avaliouse non só o contido e a calidade das imaxes, senón tamén o ‘tweet’ que as acompañaba. “O primeiro mundo cérralle as portas ó terceiro agás para traballar nos sectores máis duros” era o lema das fotografías presentadas por Jose Romay baixo o título ‘Os viaxeiros do Terceiro mundo’.

'Cambia, reivindica e constrúe’ foi o tema da categoría adulta nesta edición do concurso, na que as propostas debían reflectir como determinadas accións das sociedades do Norte inciden negativamente sobre as poboacións do Sur.

A entrega de premios do concurso ‘Imaxes con Fondo’ terá lugar este venres 30 de novembro, no acto de conmemoración do 15º aniversario do Fondo Galego de Cooperación e Solidariedade, que se celebrará en Santiago de Compostela. A convocatoria do certame contou coa colaboración da Asociación Provincial de Fotógrafos Profesionais de Pontevedra, a Asociación Provincial de Fotógrafos Profesionais de Lugo, a Agrupación Fotográfica Galega e a Asociación Fotográfica Galega ‘Phosgalicia’ e Agareso.

Galería:

  • Jose Romay
  • Jose Romay
  • Jose Romay


Mércores, 28 Novembro 2012 Reportaxes Ler máis...

Voces con Fondo 17 – 'Charlas contra a indiferenza' para reflexionar sobre os ODM, a cooperación e a paz

A nova entrega do programa sobre o Fondo Galego de Cooperación e Solidariedade ábrese coa estrea das 'Charlas contra a indiferenza' a cargo de Roberto Mansilla, analista do Igadi. Repasa tamén o Consello Municipalista da Cooperación, coas valoracións de distintas ONGD e a convocatoria de proxectos. Non faltan o boletín de noticias, a axenda estival e as recomendacións literarias e cinematográficas.

  Download Embed Embed this video on your site


Luns, 02 Xullo 2012 AG Radio Ler máis...

Voces con Fondo 16 - Preséntase ante a asemblea o proxecto 'Redes para o desenvolvemento'

Voces con Fondo debulla a nova convocatoria de Vacacións con Traballo, o programa de voluntariado internacional do Fondo Galego de Cooperación e Solidariedade. Ofrécenos asemade o resumo da asemblea xeral de socios e unha entrevista coas parceiras portuguesas do proxecto europeo 'Redes para o desenvolvemento'. As noticias breves, a axenda de actividades e o libro e mais o filme recomendados pechan a edición.

Download Embed Embed this video on your site


Martes, 01 Maio 2012 AG Radio Ler máis...
<< Inicio < Anterior 1 2 3 4 5 Seguinte > Final >>
Páxina 1 de 5

Mapa de proxectos

Agareso Radio

Programa online

Axenda

Setembro 2014
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5