Os dereitos humanos pertencen por igual a cada un de nós e mantéñennos unidos como unha comunidade mundial que comparte os mesmos ideais e valores, e como comunidade mundial na que todos compartimos un día en común: o Día dos Dereitos Humanos o 10 de decembro, no que se rememora o nacemento, hai 63 anos, da Declaración Universal dos Dereitos Humanos.
Este ano, millóns de persoas decidiron que chegara o momento de reclamar os seus dereitos, saíron ás rúas e esixiron un cambio. Moitos fixéronse oír utilizando Internet ou enviando mensaxes instantáneas para informar, inspirar e mobilizar os seus simpatizantes na busca dos seus dereitos humanos fundamentais.
"Moitas das persoas que buscaban lograr as súas lexítimas aspiracións estaban conectadas a través das redes de comunicación social. Atrás quedan os días en que os gobernos represivos podían controlar por completo o fluxo de información, afirmou o Secretario Xeral da ONU, Ban Ki-moon.
Os medios de comunicación social axudaron aos activistas a organizar movementos pacíficos de protesta en cidades de todo o mundo - dende Túnez a Madrid, dende El Cairo a Nova York - ás veces facendo fronte a unha violenta represión.
"Sabemos que aínda hai demasiada represión no noso mundo, demasiada impunidade, que aínda quedan demasiadas persoas cuxos dereitos non son aínda unha realidade. Non obstante, agora que remata un ano extraordinario para os dereitos humanos, tomemos forza dos logros alcanzados neste 2011", engadiu o máximo responsable de Nacións Unidas.
Pola súa banda, a Alta Comisionada da ONU, Navi Pillay, invitou todos os cidadáns a sumarse á campaña en Internet, a través de Twitter, Facebook, YouTube e Weibo, para divulgar información sobre os seus dereitos e impulsar as denuncias das súas violacións.
