José Augusto Mendoça / Bissau, ANG.- A entrega foi feita polo embaixador do Brasil en Guinea-Bissau, Jorge Geraldo Kadry ao primeiro ministro, Carlos Gomes Júnior, que na ocasión agradeceu o goberno brasileiro e recordou a axuda que este fixo ao país dende os anos da independencia e que comprenden áreas como educación, agricultura e, agora, a mellora da saúde.

Carlos Gomes recordou tamén que foi grazas á influencia deste país "irmán lusófono", xunto coa ONU, que se fixo posible a adopción de proxectos relacionados coa realización dos Obxectivos de Desenvolvemento do Milenio (ODM) no que respecta a Guinea-Bissau, e cuxos obxectivos se resumen nos slogans "Saúde para Todos" e "Combate a Pobreza".

Carlos Gomes Júnior recoñeceu que Guinea-Bissau ten dificultades no combate do VIH/SIDA, polo que os apoios recibidos ata aquí de parte do Fondo Global e algunha ONG se revelaron moi importantes.

O xefe do executivo pediu aínda máis apoios de parte destes compañeiros con destino a diminuír a propagación da epidemia no país, malia que se estea a rexistrar unha redución significativa neste sentido, segundo o informe do ano pasado do Secretariado Nacional de Loita contra a Sida (SNLS).

Gomes Júnior destacou que o goberno debe contribuír nese proceso, a través da exención da taxa aduaneira non só deses medicamentos, senón de todos os materias postos a disposición do goberno e destinados ao ben da sociedade guineense.

"Moitas veces iso non sucede por falta da sensibilidade dos técnicos", criticou o xefe do goberno, que revelou que xa ordenou ao seu ministro da Saúde que lle informe cando xurda unha situación deste tipo, para así poder tomar unha decisión en menos de "48 horas".

Para o Embaixador Jorge Geraldo Kadri, a entrega destes remedios constitúe un orgullo e aproveitou a ocasión para anunciar a entrega o próximo ano de cinco mil preservativos, todo no cadro do combate da enfermidade da Sida.

"Brasil agora actúa tamén nos dominios de Saúde, Defensa e Formación Técnico Profesional", informou o diplomático brasileiro.

O secretario executivo do SNLS, João José Silva Monteiro recordou que a oferta traduce o empeño do goberno guineense no combate da Sida e engadiu que os medicamentos agora recibidos van axudar a trabar a propagación da epidemia.

Con iso, proseguiu o secretario executivo do SNLS, os 4.320 seropositivos identificados no réxime de tratamento vanse beneficiar dun seguimento gratuíto e de calidade para que poidan vivir máis tempo.

"O Sida é unha enfermidade que destrúe o noso organismo e hai necesidade de trabar a súa evolución no noso corpo e fortalecer as nosas defensas para poder levar unha vida saudable. E iso é posible con medicamentos como o antirretroviral ", concluíu João José Silva Monteiro.