Así o indicou a titular do departamento de Benestar da Xunta de Galicia, Beatriz Mato, no acto de apertura da asemblea xeral, que a Confederación Galega de Persoas con Discapacidade (Cogami) celebrou en Santiago, onde tamén resaltou a importancia de que o documento incorpore a perspectiva de xénero, con medidas específicas que permitan ás mulleres con discapacidade facer fronte “á dobre discriminación que sofren”.

Ademais, a conselleira afirmou que “o principio de que non é a persoa con discapacidade a que presenta problemas de adaptación ao entorno, senón que é o entorno o que debe estar, desde o principio, deseñado para todos, sitúa a Galicia por diante e sustenta o compromiso da Xunta con este colectivo”.

Así, Mato resaltou que o Plan para Persoas con Discapacidade de Galicia inclúe o principio do deseño universal en todos os ámbitos, e como obxectivos prioritarios deste documento tamén sinalou o impulso á accesibilidade universal e a promoción da vida autónoma para conseguir a plena inclusión na vida comunitaria.

A titular do departamento autonómico lembrou que este plan xa está en marcha e que está dotado con máis de 700 millóns de euros para esta lexislatura.

Así mesmo, subliñou que a través do Plan Social, a Xunta aspira a integrar a 4.9000 persoas con discapacidade o en risco de exclusión ao longo dos próximos anos. “Temos incrementado, con bos resultados, os nosos orzamentos para impulsar a inserción laboral das persoas deste colectivo”, apostilou.

Neste aspecto, Mato gabou o labor que está a facer Cogami, lembrando que esta confederación dá emprego a máis de 600 persoas con discapacidade. “É un bo camiño que debemos seguir todos os axentes e administracións implicados na mellora da calidade de vida destas persoas”, concluíu.