Concienciar ás familias da importancia de que as nenas continúen na escola e facilitarlles apoio para iso, é o obxectivo da campaña ELLA. Con esta iniciativa, Intervida quere sensibilizar e buscar a complicidade da sociedade para crear un fondo de bolsas para 3.000 nenas de 12 anos de Burkina Faso, El Salvador e Bangla Desh. Así, poderán continuar os seus estudos e optar a unha mellor calidade de vida que lles permita romper coa pobreza e os seus riscos.
No mundo viven 600 millóns de nenas adolescentes, 250 millóns con menos de 2 $ diarios. Neste contexto e ante a inexistencia dunha educación secundaria obrigatoria na maioría de países en desenvolvemento, é habitual que as nenas abandonen a escola despois da primaria e queden relegadas ao coidado da casa e irmáns, se convertan en esposas e nais antes de tempo, sexan enganadas por mafias, ou convertida en mercadorías de venda pola súa propia familia para saír adiante.
Non obstante, reverter esta situación é posible. Jesmin, Runa,Shadia e Fatema forman parte da primeira xeración que tras cursar estudos de primaria nunha das escolas de Intervida en Bangla Desh finalizou a secundaria. Agora teñen a posibilidade de ir á Universidade, e a diferenza dos seus pais e avós enfróntanse a un futuro con maiores oportunidades. A campaña ELLA quere que outras 3.000 nenas como Jesmin, Runa, Shadia ou Fatema teñan unha oportunidade.
A educación supón un futuro para elas e as súas familias. Dálles a oportunidade de formarse para poder optar a un traballo digno, tomar decisións e defender os seus dereitos. É un feito que cando as mulleres obteñen ingresos, reinvisten un 90% nas súas familias; pero tamén que cando unha nena recibe sete ou máis anos de educación, casa catro anos máis tarde e ten 2 fillos menos; e que por cada ano adicional de educación primaria que recibe aumenta o salario entre un 10 e un 20%, e entre un 15 e un 25% por cada ano adicional de secundaria.
Queres colaborar con Intervida? Aquí tes toda a información. Só tes que decidirte e encher o formulario con todos os teus datos e a achega económica que prefiras. Tamén podes difundir e compartir a campaña nas redes sociais, como Facebook e Twitter, publicando o vídeo ou facendo un twit co #YotambiénsoyELLA.
