Para os que traballamos en proxectos de cooperación, a redución en 600 millóns de euros da axuda oficial ao desenvolvemento, entre este ano e o 2011, é unha traizón ao compromiso que adquiriu Zapatero coa axuda humanitaria e a cooperación internacional. A medida fai imposible acadar en 2012 o obxectivo do 0,7% e é unha patada aos desfavorecidos e marxinados polo sistema, aos máis castigados pola crise global causada pola aristocracia financeira dos países desenvolvidos, que se mantén incólume, inmune e impune.

Agora o mellor é intentar axudar o presidente do Goberno español a recobrar a cordura achegando solucións. A miña proposta é a que eu chamo 600 millóns por 600 millóns: cobrar aos clubs de fútbol español os 627 millóns de euros que deben a Axencia Tributaria (cifra publicada en 2009) e non tocar a partida de cooperación ao desenvolvemento, podendo manter así os obxectivos de redución do déficit público. Os números cadran.

É unha medida de xustiza social e coherente: os 600 millóns do fútbol polos 600 millóns da solidariedade para atallar o déficit fiscal do Estado español.